नारी दिवस लक्षित महिला भलिवल प्रतियोगिता हुँदै

ओखलढुंगा (रेडियो ओखलढुंगा )खिजीदेम्बा गाउँपालिकाले ११५ औं अन्तराष्ट्रिय महिला दिवसको अवसरमा महिला भलिवल प्रतियोगिताको आयोजना गर्ने भएको छ । महिला दिवसको अवसर पारेर गाउँपालिकाले खुला वडा स्तरीय महिला भलिवल प्रतियोगिता आगामी फागुन २१ गते देखी २४ गते सम्म सञ्चालन गर्ने भएको हो । महिला दिवसको अवसरमा विभिन्न कार्यक्रमसँगै भलिवल प्रतियोगिता हुने र २४ गते भलिवल प्रतियोगिताको फाईनल खेल सञ्चालन हुनेछ । प्रतियोगिता सञ्चालनबाट महिलामा भएको क्षमताको पहिचान गर्दै देश तथा विदेशमा समेत खिजिदेम्बा गाउँपालिकाका महिलाहरुलाई सहभागी गराउने र चुलोचौकोमा मात्रै सिमीत नरही खेल क्षेत्रमा प्रतिनिधित्व बढाउने प्रतियोगिताको उद्धेश्य रहेको गाउँपालिका अध्यक्ष शेर्पाले बतानुभयो ।
खुला वडा स्तरीय महिला भलिवल प्रतियोगिताका विजेताले नगद रु १ लाख १ हजारका साथमा ट्रफी, मेडल र प्रमाण–पत्र प्राप्त गर्ने छन । त्यस्तै दोश्रो हुने टिमले नगद रु ७६ हजार, तेश्रोले ५१ हजार सहित ट्रफी, मेडल र प्रमाण–पत्र प्राप्त गर्ने छन । त्यस्तै प्रतियोगितामा सान्त्वना हुने टीमलाई नगद रु २५ हजारका साथमा प्रमाणपत्र प्रदान गरिने गाउँपालिका अध्यक्ष शेर्पाले जानकारी दिनुभयो ।
भलिवल प्रतियोगितामा विषयगत विधा तर्फ उत्कृष्ट हुने तथा अनुशासीत खेलाडीलाई जनही नगद रु ३ हजार ५५५ का साथमा ट्रफी, मेडल र प्रमाणपत्र प्रदान गरिने आयोजक खिजिदेम्बा गाउँपालिकाले जनाएको छ । त्यस्तै उत्कृष्ट स्पाईकर, उत्कृष्ट डिफेन्डर, उत्कृष्ट सेटर र उत्कृष्ट सर्भरलाई पनि जनही नगद रु २ हजारका साथमा ट्रफी, मेडल र प्रमाणपत्र प्रदान गरिने आयोजकले जनाएको छ ।