१० फागुन, काठमाडौं । युएईसँग पराजित भएपछि नेपालले ८ महिनापछि अस्ट्रेलियामा हुने आईसीसी टी–२० विश्वकपमा छनोट हुन असफल भएको छ ।
ग्लोबल क्वालिफायर ‘ए’को समूह चरणमा निकालेको शतप्रतिशत जितले हौसिएको नेपाली टोलीले सेमिफाइनलमा यूएईबाट १७६ रनको लक्ष्य पाएको थियो । यो लक्ष्य भेट्टाएको भए नेपाल विश्वकपमा पुग्थ्यो । तर ८ बल बाँकी छँदा १०७ रनमा अलआउट भएपछि नेपालको विश्वकप खेल्ने सपना अधुरै रह्यो ।
आठ वर्षको अन्तरमा दोस्रोपल्ट टी–२० विश्वकप खेल्ने सपनाको संघारमै पुगेर फिर्ता हुनु दुःखद हो । तर जुन धरातलमा नेपाली टोली विश्वकप छनोट खेल्न गएको थियो र अरु टिमले जसरी तयारी गरेका थिए, त्यस आधारमा नेपाल विश्वकपमा छनोट हुन सक्ने गरी तयार थियो त भन्ने प्रश्न उठ्छ ।
पूर्वकप्तान पवन अग्रवाल भन्छन्, ‘यो असफलताका पछाडि मैदानबाहिरका कारणहरु नै प्रमुख छन् ।’
