ओखलढुंगा (रेडियो ओखलढुंगा) । किरात राई यायोक्खाका केन्द्रीय अध्यक्ष दिवस राईले प्रदेश १ को नाममा किरात जोडिने दाबी गरेका छन् । यायोक्खा ओखलढुंगाको आठौं अधिवेशनलाई संवोधन गर्दै अध्यक्ष राईले जसका लागि आसन्न निर्वाचनमा पहिचान पक्षधरलाई जिताएर पठाउनुपर्ने विकल्प नभएको बताएका हुन् । सुदुरपश्चिमदेखि खोला, नालासँग जोडिएर नामाकरण गर्दै आउँदा प्रदेश १ लाई पनि कोसी राख्ने अन्तिम तयारी भएको तर यायोक्खाले रोकेको अध्यक्ष राईले दाबी गरे । पहिचान विना प्रदेशको नामाकरण गर्ने प्रयास भएपनि किरात राईहरुको आन्दोलनको दबाबले नामकरण रोकिएको राईको भनाइ छ ।

सबै प्रदेशको नामाकरण गर्दै गर्दा पहिचान पक्षमा उर्लिएको आन्दोलनले अन्तिम समयमा पनि नामाकरण हुन नसकेको र अब किरात जोडिएरै प्रदेशको नाम रहने अध्यक्ष राईको जिकीर छ । पहिचानको आधारमा नामकरणका लागि आन्दोलनलाई निरन्तर जारी राख्नुपर्ने, आन्दोलनको बलमा शक्ति आर्जन गर्नुको विकल्प नभएको उनको भनाइ छ । किरात सभ्याता, इतिहास, वल्लो किरात, माझ किरात राज्य सञ्चालन गरेको इतिहासका आधारमा पनि कुनैपनि अवस्थामा प्रदेशको नाममा किरात जोडिनु पर्ने भन्दै आफूहरुले पटक पटक आन्दोलन गर्नुपरेको र अझ शसक्त आन्दोलनको खाँचो रहेको राईको भनाइ छ । जसका लागि सबै किरात राईहरु एक ढिक्का भएर अघि बढ्नुपर्ने अध्यक्ष राईले आवश्यकता औल्याए ।