ओखलढुंगा (रेडियो ओखलढुंगा) । शैक्षिक अवस्थालाई सुधार गर्न खिजिदेम्बा गाउँपालिकामा साल्स परियोजना सञ्चालन हुने भएको छ । विद्यार्थीको सिकाई मूल्याङ्कन गरी सोही आधारमा कार्यक्रम सञ्चालन गर्ने हेतुले साल्स परियोजना सञ्चालन गर्न लागेको हो । गाउँपालिकाभित्रका ३७ वटा सामुदायिक र २ वटा संस्थागत विद्यालयको विद्यार्थीको सिकाईको अवस्था मूल्याङ्कन गर्ने परियोजनाको प्रारम्भिक चरणमा प्रधानाध्यापक, जनप्रतिनिधी, कार्यालयका शाखा प्रमुख लगायतसँग छलफल गरिएको परियोजना संयोजक अमिन शाक्यले जानकारी दिनुभयो । परियोजना अन्तर्गत विद्यार्थीको सिकाई, स्वास्थ्य, विषयगत ज्ञान, शिक्षक र विद्यार्थीको संख्यात्मक अवस्था, विद्यालयमा पूर्वाधारको अवस्था लगायतका अवस्था मूल्यांकन गरिने गाउँपालिका अध्यक्ष गम्बु शेर्पाले जानकारी दिनुभयो । आगामी आर्थिक बर्षदेखि शिक्षा क्षेत्रमा सञ्चालन गर्नुपर्ने कार्यक्रमका बारेमा आधार तयार गर्न परियोजनाले महत्वपूर्ण भूमिका खेल्ने विश्वास रहेको गाउाँपालिकाका प्रमुख प्रशासकीय अधिकृत डम्बरबहादुर रजनमगरले जानकारी दिनुभयो । मोवाइल एप्लिकेशनको माध्यमबाट विवरणहरु संकलन गर्ने र सोही आधारमा परियोजनाले प्रतिवेदन तयार गर्ने पद्धती रहेको शिक्षा शाखा प्रमुख बुद्धि मुलिचाले जानकारी दिनुभयो ।