१३ बैशाख २०८१, बिहिबार | Thu Apr 25 2024

सिद्धिचरण नगरभित्र बुहारीले छात्रवृत्ति पाउने



ओखलढुंगा (रेडियो ओखलढुंगा) । सिद्धिचरण नगरपालिका ओखलढुंगाले बुहारीलाई छात्रवृत्ति उपलब्ध गराउने भएको छ । नगरपालिका भित्रका सामुदायिक विद्यालयमा अध्ययनरत विवाहित छात्राहरुलाई बार्षिक ६ हजार बुहारी छात्रवृित्त प्रदान गर्ने भएको हो ।
विवाह गरेर पनि आफ्नो अध्ययनलाई निरन्तरता दिन प्रेरित गर्ने हेतुले बुहारी छात्रवृत्ति अभियान सञ्चालन गरेको नगरप्रमुख तेजन खनाल तेजेन्द्रले जानकारी दिनुभयो । ‘विवाह गरेपछि चुलो चौका, गाईगोठ, मेलापातमा सिमित हुनुपर्ने वाध्यात्मक अवस्थालाई मध्येनजर गर्दै समयसापेक्ष शिक्षा हासिल गर्न विवाहितहरुलाई समेत सहज होस् भन्ने हेतुले यो कार्यक्रम सञ्चालनमा ल्याएका हौं ।’ उपप्रमुख केदरबाबु वस्नेतले रेडियो ओखलढुंगासँग भन्नुभयो ।
बुहारीहरु घरको कामधन्दा सकेर पनि अध्ययनलाई पूरा गर्न सकियोस् भन्ने हेतुले नगरभित्र बुहारी छात्रावृत्ति कार्यक्रम लागू गरिएको प्रमुख प्रशासकीय अधिकृत बलराम लम्सालले जानकारी दिनुभयो ।
विवाहित छात्राहरुले रितपूर्वक सम्बन्धित विद्यालयबाट शैक्षिक सत्र २०७९ मा शिक्षा, युवा तथा खेलकूद शाखाका आवेदन पेश गर्नुपर्ने शिक्षा शाखा अधिकृत फणिन्द्रबहादुर कटवालले जानकारी दिनुभयो । आवेदकहरु प्रचलित कानून अनुसार उमेर पूरा भई विवाह गरेका, नगरपालिकाभित्र सञ्चालित सामुदायिक विद्यालयमा भर्ना भई नियमित अध्ययन गरिरहेको हुनुपर्ने प्रवधान तोकिएको छ ।

प्रकाशित मिति : १५ माघ २०७९, आइतबार  ७ : ०४ बजे


©2024 Radio Okhaldhunga सर्वाधिकार सुरक्षित