ओखलढुंगा (रेडियो ओखलढुंगा) । मानेभन्ज्याङ गाउँपालिकाले वाम्बुले भाषाको स्थानीय पाठ्यपुस्तक तयारीका लागि वजेट विनियोजन गरेको छ । वाम्बुले जातिको बाहुल्य रहेको मानेभन्ज्याङमा पाठ्यपुस्तक तयारीका लागि १२ औं गाउँसभाले बजेट विनियोजन गरेको हो । विभिन्न विद्यालयमा वाम्बुले भाषा शिक्षण गराउने हेतुले चालू आर्थिक बर्षमा ५ लाख रुपैयाँ बजेट विनियोजन गरेको अध्यक्ष ज्ञानेन्द्र रुम्दालीले जानकारी दिनुभयो । स्थानीय पाठ्यक्रममा समावेश गरी वाम्बुले लगायत विभिन्न मातृभाषा अध्ययपन गराउने पालिकाको नीति अनुरुप पहिलो चरणमा वाम्बुले भाषाको पाठ्यपुस्तक निर्माणका लागि बजेट विनियोजन गरेको अध्यक्ष रुम्दालीको भनाइ छ । बार्षिक रुपमा स्थानीय आवश्यकता, समुदायको वाहुल्यता, विद्यालयको माग अनुसार पाठ्यपुस्तक छपाई गरी विद्यालयहरुमा निःशुल्क वितरण गर्ने गाउँपालिका शिक्षा, युवा तथा खेलकूद शाखाले जनाएको छ ।