ओखलढुंगा (रेडियो ओखलढुंगा) । जेठ १ गतेबाट ओखलढुंगामा सञ्चालन हुने कोशी प्रदेश स्तरीय मुख्यमन्त्रीकप पुरुष फुटबल प्रतियोगिताका लागि व्यवस्थापन मूल समिति गठन गरिएको छ । जिल्ला खेलकुद विकास समिति ओखलढुंगका अध्यक्ष प्रविन श्रेष्ठको अध्यक्षतामा ३५ सदस्यीय कार्यसमिति गठन गरिएको हो । प्रदेश खेलकुद विकास बोर्डको आयोजना तथा जिल्ला खेलकुद विकास समिति ओखलढुंगाको समन्वयमा सदरमुकामस्थित वडा नं. १२ को स्थानीय खेलमैदानमा सञ्चालन हुने प्रतियोगिताका लागि बुधबार गरिएको जिल्लास्थित सरोकारवालाहरुसँगको भेलाबाट व्यवस्थापन मूल समिति गठन गरिएको अध्यक्ष श्रेष्ठले जानकारी दिनुभयो । कार्यसमितिमा खेलकुद सहित होटल व्यवसायी, उद्योग वाणिज्य संघ, स्वास्थ्य, प्रशासन, प्रहरी, सुरक्षाकर्मी, स्थानीय तह, स्थानीय गुठी तथा युवा क्लव, पत्रकार समेटिएको अध्यक्ष श्रेष्ठले बताउनुभयो । मूल समितिबाट उपसमिति गठन गरी प्रतियोगिता सञ्चालनका कार्यहरु बाँडफाड गर्ने जनाएको छ । प्रतियोगितामा कोशी प्रदेशबाट १४ ओटै जिल्लाका खेलाडी, टिम व्यवस्थापक र टिम कोच गरी अनुमानित ३ सय ८ जनाको सहभागिता रहने जनाएको छ । प्रतियोगिताको उद्घाटन समारोहमा कोशी प्रदेशका मुख्यमन्त्री हिक्मत कार्की आउने बुझिएको छ ।