ओखलढुंगा (रेडियो ओखलढुंगा) । सिद्धिचरण नगरपालिका ओखलढुंगा र नेपाल पत्रकार महासंघ, ओखलढुंगा शाखाले १० जना पत्रकारलाई लेखनवृत्ति पुरस्कार प्रदान गरेको छ । जिल्लाको स्थानीय सञ्चारमाध्यममा कार्यरत १० पत्रकारलाई जनही १० हजारका दरले लेखनवृत्ति प्रदान गरेको हो । नगरभित्रका शिक्षा, स्वास्थ्य, संस्थागत विकास, पशु लगायतका विषयमा समाचार लेखन प्रकाशन गर्ने पत्रकारलाई नगर प्रमुख तेजन खनाल तेजेन्द्रले लेखनवृत्ति प्रदान गरेको हो । त्यस्तै, कृषि, पर्यटन, पूर्वाधार लगायतका क्षेत्रमा कलम चलाउनेलाई लेखनवृत्ति वापत पुरस्कार नगर उपप्रमुख केदरबाबु वस्नेतले प्रदान गर्नुभयो । त्यस्तै, खेलकूद, युवा लगायतका क्षेत्रमा खोजमुलक समाचार प्रकाशन गर्ने पत्रकारलाई प्रोत्सानसहित पुरस्कार वितरण गरेका छन् । यसरी लेखनवृत्ति पुरस्कार प्राप्त गर्नेमा नागरिकमिडियाका प्रधानसम्पादक शिवप्रसाद ढुंगाना, ओखलढुंगाखबरडटकमका प्रधानसम्पादक नवराज कार्की, आफ्नो एफएमकी माया राई र सरस्वती विक, रेडियो ओखलढुंगाका रीता तामाङ र प्रमिला श्रेष्ठ, सहयात्री रेडियोका ध्रुव धमला, भिजन नेपालका सरस्वती बानिया, एसवि जेरो र प्रविन मुदेल रहेका छन् । लेखन क्षेत्रमा कौशलता बृद्धि गरी प्रोत्साहन गर्ने र नगरभित्रका सकारात्मक प्रयासहरुलाई समाचारको सुसुचित गर्ने हेतुले लेखनवृत्ति कार्यक्रम सञ्चालन गरेको र अन्य स्थानीय तहसँग समेत साझेदारीमा आगामी दिनमा पत्रकारितासँग सम्वन्धि थप कार्यक्रमहरु सञ्चालन गर्ने अध्यक्ष लाक्पा जी शेर्पाले जानकारी दिनुभयो ।