ओखलढुंगा (रेडियो ओखलढुङ्गा) । ओखलढुंगामा प्रदेशस्तरीय मुख्यमन्त्री कप नकआउट पुरुष फुटबल प्रतियोगिता सुरु भएको छ । प्रतियोगिताको उद्घाटन खेलमा ओखलढुंगा र उदयपुरले जित निकालेको छ । सदरमुकाम ओखलढुंगास्थित खेल मैदानमा सुरू भएको प्रतियोगितामा सोलुखुम्बुलाई ३–१ गोलले हराउँदै ओखलढुंगाले जित निकालेको हो । त्यस्तै, मोरङलाई शून्यका विरुद्ध १ गोलले पराजित गर्दै उदयपुरले विजयी सुरुवात गरेको जिल्ला खेलकूद विकास समितिका अध्यक्ष प्रविण श्रेष्ठले जानकारी दिनुभयो । मगलबार खेल धनकुटा र भोजपुर, सुनसरी र पाँचथरबीच हुँदैछ । प्रदेशभित्रका ताप्लेजुङ बाहेक सबै जिल्लाबाट खेलाडीहरु प्रतियोगितामा सहभागि रहेको प्रदेश खेलकूद परिषद्का सदस्य सचिव हंशराज वाग्लेले जानकारी दिनुभयो । बाढी पहिरोका कारण ताप्लेजुङबाट खेलाडी आउन नपाएपछि आयोजकले इलामलाई वाकओभर दिएर विजयी घोषणा गरेको वाग्लेको भनाइ छ । असार ९ गतेसम्पन्न हुने प्रतियोगिता उद्घाटन सत्रमा प्रदेश सभा सदस्य प्रदीप सुनुवार, एन्फाका मानार्थ उपाध्यक्ष किशोर राई, सिद्धिचरण नगरपालिकाका मेयर तेजन खनाल लगायत उपस्थित हुनुहुन्थ्यो । सोमबारको खेलमा ओखलढुंगाका संजय गुरुङ र उदयपुरका १ गोल गर्न सफल सुनिल खड्का म्यान अफ दी म्याच घोषित हुँदै ४ हजार नगद प्राप्त गर्नुभएको छ ।