ओखलढुंगा (रेडियो ओखलढुंगा ) कोशी  प्रदेश स्तरिय मुख्यमन्त्री कप नकआउट फुटबल प्रतियोगिताकोे उपाधि इलामले जितेको छ । ओखलढुंगामा शनिवार भएको फाइनल खेलमा संखुवासभालाई ३–० गोल अन्तरले पराजित गर्दै इलामले उपाधि जितेको हो । प्रतियोगितामा कोशी प्रदेशका १३ जिल्लाको सहभागिता रहेको जिल्ला खेलकुद विकास समिति ओखलढुंगाका अध्यक्ष प्रविन श्रेष्ठले जानकारी दिनुभयो। फाइनल खेलको म्यान अफ द म्याच इलामका पिकेश लोक्तामले पाए भने उत्कृष्ट गोलरक्षक मौसम मगर, उत्कृष्ट डिफेन्डर आयुष तिमिल्सिना, उत्कृष्ट स्ट्राईकर संखुवासभाका मन्दिप राई र बेस्ट कोच इलामका छिरिङ पासाङले प्राप्त गरेको छ । उच्च गोलकर्ताको पुरस्कार ओखलढुंगाका सन्जय गुरुङ र म्यान अफ द सिरिजको उपाधि इलामका विशाल तामाङले प्राप्त गरेको छ । प्रत्येक विधाका उत्कृष्ट खेलाडीले नगद पुरस्कार पाएको छ । खेलकुद विकास बोर्ड कोशी प्रदेशको आयोजनामा गत असार ४ गते बाट ओखलढुंगामा प्रतियोगिता सुरु भएको थियो । प्रतियोगितामा विजेताले नगद २ लाखको साथमा शिल्ड मेडल र प्रमाणपत्र प्राप्त गरेको छ । उपविजेताले नगद १ लाखको साथमा शिल्ड, मेडल र प्रमाणपत्र प्राप्त गरेका छन ।