ओखलढुंगा रेडियो ओखलढुंगा करदाता सेवा कार्यालय ओखलढुंगाले व्यवसाय दर्ता गरेर संचालन गर्न आग्रह गरेको छ ।करदाता सेवा कार्यालयले आफ्नो कार्यक्षेत्र ओखलढुंगा र सोलुखुम्बुको खुम्बु पासाङल्हामु गाँउपालिका बाहेकका सबैलाई व्यवसाय दर्ता गरेर संचालन गर्न अनुरोध गरिएको हो । सोमबार कार्यालयले एक सुचना जारी गर्दै आफ्नो कार्य क्षेत्र भित्र रहेका व्यवसायहरुलाई प्रचलित कानुन अनुसार दर्ता गरेर संचालन गर्न जानकारी गराएको करदाता सेवा कार्यालय ओखलढुंगाका कर अधिकृत धिरेन्द्र बस्नेतले बताउनु भयो ।
यदि कसैले सुचनाको वेवास्ता गरि संचालन गरेमा अनुगमन तथा निरिक्षणका क्रममा आयकर ऐन २०५८, नियमावली २०५९, मुल्य अभिबृद्धिकर ऐन २०५२, तथा नियमावली २०५३ र अन्त शुल्क ऐन २०५८, तथा नियमावली २०५९ साथै प्रचलित कानुन बमोजिम दण्ड जरिवाना तथा कर निर्धारण गरिने उल्लेख गरिएको छ । व्यवसाय दर्ता गरेर स्थायी लेखा नम्बर लिएर मात्र सुरु गर्न र व्यवसाय अनुसार मदिराजन्यका लागि इजाजत लिई अन्तशुल्कको टिकट लगाएको एकिन गरेर मात्र बिक्रि बितरण गर्नु पर्ने सुचनामा भनिएको छ । प्रत्येक कारोवारमा बिल लिने दिने तथा खरिद बिक्रि खाता अध्याबधिक गर्ने, कारोबार स्थलमा करपाटी तथा कर दर्ता प्रमाणपत्र राख्ने, भुक्तानी गर्न बाकी रहेको आयकर मल्य अभिबृद्धि कर , अन्तशुल्कको रकम तुरुन्त दाखिला गर्न समेत अनुरोध गरिएको छ ।