मोलुङ गाउँपालिकाद्वारा सगरमाथा आरोहीलाई सम्मान

ओखलढुंगा (रेडियो ओखलढुंगा )ओखलढुंगाको मोलुङ गाउँपालिकाले सगरमाथा आरोहीहरुलाई सम्मान गरेको छ । जिल्लाको मोलुङ गाउँपालिका भित्र बसोबास गरेर विभिन्न मितिमा विश्वको सर्वोच्च शिखर सगरमाथाको सफल आरोहण गर्ने ८ जनालाई पालिकाले सम्मान गरेको हो ।निवर्तमान संघिय सांसद यज्ञराज सुनुवारको प्रमुख अतिथ्यतमा काठमाडौंमा आज शुक्रबार एक कार्यक्रमका बिच सम्मानपत्र, खदाँ र मालाले सम्मान गरिएको हो ।
सम्मान हुनेहरुमा सफलता पूर्वक सगरमाथाको आरोहण गर्ने देण्डी शेर्पा, वङाड शेर्पा, आङबाबु शेर्पा, छेपाल शेर्पा, शेरे शेर्पा, तेन्जी शेर्पा राम मगर र सबिन मगर रहेका छन् ।
कार्यक्रमका प्रमुख अतिथि यज्ञराज सुनुवारले सगरमाथा आरोहीहरूलाई बधाई तथा शुभकामना व्यक्त गर्दे आगामी दिनहरूमा पनि यस्तै किसिमको सफल आरोहण गरी जिल्ला र देशको नाम उच्च राख्न अनुरोध गर्नुभयो ।गाउँपालिका अध्यक्ष उत्तम राईको सभापतित्वमा भएको कार्यक्रममा मोलुङ गाउँपालिका संस्थापक अध्यक्ष मणिराज राई, वडा नम्बर ३ का वडाध्यक्ष मित्र सुनुवार, ४ का वडाध्यक्ष भोलाराज राई, ७ का वडाध्यक्ष हेम बहादुर सुनुवार र ८ का वडाध्यक्ष सुधिर राई लगाएत बिशिस्ट ब्यक्तिहरूको उल्लेखनीय उपस्थिति रहेको मोलुङ गाउँपलिकाका प्रमुख प्रशासकीय अधिकृत उपेन्द्र राईले बताउनुभयो ।मोलुङ ७ का ७ जना र मोलुङ ६ का एक जना गरि ८ जनालाई सम्मान गरिएको पालिकाले जनाएको छ ।