ओखलढुंगा (रेडियो ओखलढुंगा) । ओखलढुङ्गामा अपेक्षा गरिएभन्दा ढिला मत गणना सुरु भएको छ। दिनभरको रस्साकक्सी पछि केहीबेर अघि मतगणना सुरु भएको मतदान स्थलमा रहनु भएका सहकर्मी ध्रुब धमलाले जानकारी दिए। लिखु गाउँपालिका ८ टारकेराबारी वडा कार्यालय मतदान केन्द्र (ख)मा प्रदेश सभाको मतपत्रमा प्रतिनिधि सभाको मतपत्र ६२ र मोलुङ गापा प्राप्चा गुरूकुल बेदविद्धाश्रम (क) केन्द्रमा १२ वटा प्रतिनिधि सभाको मतपत्र प्रदेशसभाको मतपत्रको रूपमा प्रयोग भएको पाइएपछि मतगणना कसरी गर्ने भन्ने विषयमा दलहरुबीच सहमति नहुदाँ मत गणनामा ढिला भएको हो । मत गन्ने विषयमा दलहरुबीच सहमति नभएपछि जिल्ला निर्वाचन कार्यालयमा भएको छलफलमा दलहरु निर्वाचन अयोगको निर्णय कुर्न तयार भएका थिए। केन्द्रले विवाद समाधानका लागि दलहरुले सहमति खोज्ने र नभए आयोगको निर्णय अनुसार गर्ने परिपत्र गरेपछि मतगणना सुरु गर्न दलहरु तयार भएका हुन । यसअघि, २ बजे नै दलहरुबीच छलफल भएपनि प्रदेशको मतगणनाबारे सहमति भएपनि संघको मतगणनाका लागि सहमति बनेको थिएन । त्यसअघि लिखु गाउँ पालिकाको मतपेटिका ल्याउन ढिला भएपछि, सर्वदलिय बैठक बस्न नै ढिला भएको थियो । मत पेटिका बोकेको सवारी साधन बाटैमा विग्रीएकाले लिखु गाउँपालिकाको मतपत्र मध्यान्ह १२ बजेपछि मात्रै मतगणनास्थलमा ल्याइपु¥याइएको थियो।